Kora DailyUpdates
آخر التحديثات
كل التغييرات اللي بتفرق معاك: محتوى جديد، تعديلات في القواعد، وتصليحات بعد ما لاعيبة بعتولنا غلطات. لقيت غلطة؟ ابعتها من صندوق «لقيت غلطة أو عندك اقتراح؟» تحت أي لعبة.
١ نوفمبر ٢٠٢٦
- «الشبكة»: لما لاعب ميجيش في أي خانة، بقينا نقولك أنهي شرط فيهم مش بيجمعه وليه. كتير منكم كتب ساديو ماني في «كأس العالم ٢٠٢٢»: ماني كان في قايمة السنغال، بس اتصاب مع بايرن وطلع منها يوم ١٧ نوفمبر ٢٠٢٢ قبل البطولة، ومالعبش ولا دقيقة في قطر.
- «الشبكة» من بكرة: لاعيبة موناكو بقوا محسوبين «لعب في دوري فرنسا» (زي تييري هنري)، «أحمد فيليكس» بقى بيجيب فيليكس أبواغي مهاجم الأهلي والزمالك، ويوسف أسامة نبيه اتضافله الاتحاد السكندري وأسوان. شكرًا للي بلّغوا!
- «سمّي الـ١١» و«تشكيلة مين؟»: راجعنا كل تشكيلات مصر والأهلي والزمالك وبيراميدز على بيانات Transfermarkt ماتش بماتش، وصلّحنا مراكز ٢٠ تشكيلة (منها نهائي بيراميدز وصن داونز ٢٠٢٥) وأرقام فانلات (أبوتريكة كان لابس ٢٢ في أم درمان).
- «سمّي الـ١١»: لو كتبت اسم لاعب بطريقة تانية (فلافيو / فلافيو أمادو، أليسون / أليسون بيكر) بقى بيتحسب صح.
- «تشكيلة مين؟» و«سمّي الـ١١»: مراكز لاعيبة الأهلي في نهائي أفريقيا ٢٠٠٧ (الإياب) و٢٠٠٦ (الذهاب) اتصلحت (٣-٥-٢ بتاعة مانويل جوزيه). شكرًا للي بلّغوا!
٣١ أكتوبر ٢٠٢٦
- من لغز #٣٢ (بكرة): أمم أفريقيا ٢٠٢٥ بتتحسب تاني للاعيبة المغرب، زي السجل الرسمي للكاف (لجنة الاستئناف، ١٧ مارس ٢٠٢٦). مصدر كل معلومة موجود في رابط تحت اللغز.
- الترتيب: نتايج لاعيبة كانت بتتشال من الترتيب غلط لما اتنين بيلعبوا من نفس شبكة الموبايل بنفس نوع الموبايل. اتصلح من النهارده، والترتيب بيتحدث على طول بعد ما تخلّص لعبة.
- «أعلى ولا أقل»: ماتشات ياسين بونو الدولية كانت ٨٧ من جدول قديم (قبل كاس العالم)، والصح ٩٩ زي Transfermarkt. اتصلحت من النهارده، ومعاه يوسف النصيري (٩٢) ورومان سايس (٨٦). شكرًا لكل اللي بلّغوا!
- من لغز #٣٥ (الأربع): «توب ١٠» بقت قوايم لاعيبة بس (من غير أندية ولا منتخبات ولا استادات)، ومعاها قوايم جديدة: أكتر هدافين دوليين في التاريخ، أكتر اللي لعبوا في الدوري الإنجليزي، وهدافين برشلونة ومانشستر يونايتد وباريس سان جيرمان.
٣٠ أكتوبر ٢٠٢٦
- «توب ١٠»: علم راؤول (إسبانيا) وكونتس (ألمانيا) كان ناقص في قوايم هدافي دوري الأبطال والدوري الإسباني والبوندسليجا، وبقى ظاهر. شكرًا لـkadora22!
٢٨ أكتوبر ٢٠٢٦
- من لغز #٢٩ (بكرة الخميس): الأسئلة بقت ٤٠٪ عن الكورة المصرية، و٥٥٪ عن الكورة الأوروبية والعالمية (أغلبها الدوريات الخمسة الكبار)، و٥٪ حاجات تانية. ومعاها قوايم جديدة في «توب ١٠»: آخر ١٠ أبطال لدوري أبطال أوروبا والدوري الإنجليزي والإسباني والإيطالي وكاس العالم واليورو، آخر ١٠ كسبوا الكورة الدهبية، وأكتر الهدافين في تاريخ دوري الأبطال وكاس العالم والدوريات الكبيرة. وكل سنة في قوايم الأبطال اتراجعت على مصدر تاني.
- من لغز #٢٩: ضفنا ١٣٦ نادي كانوا ناقصين في مسيرة ١١٧ لاعب (زي محمود صابر في سموحة)، من كووورة ومصدر تاني معاه، فإجابات صح كانت بتترفض في «الشبكة» هتتقبل. وأمم أفريقيا ٢٠٢٥ (لسه قدام المحكمة الرياضية) مبقتش بتتحسب كبطولة للاعيبة المغرب لحد ما الموضوع يتحسم. شكرًا لكل اللي بلّغوا!
- من لغز #٢٩: عماد متعب لعب في ستاندر لييج، فبقى يتقبل في «لعب في دوري بلجيكا» وفي ستاندر. شكرًا لـ3ssaMGamal!
٢٦ أكتوبر ٢٠٢٦
- من لغز #٢٨ (الأربع): أسئلة أقل عن الدوري السعودي، وأكتر عن الدوري المصري والكورة الأوروبية، زي ما أغلبكم قال في الاستبيان. شكرًا لكل اللي جاوبوا!
- من لغز #٢٩ (الخميس): اللاعب اللي بيلعب في مركزين بقى يتقبل في الاتنين لما المصادر تقول كده (زي نيمار مهاجم، وهافيرتز لاعب وسط). والبطولات اللي اللاعب كسبها وهو مدرب مبقتش بتتحسب له كلاعب (زي مات باسبي ودوري الأبطال ١٩٦٨). راجعنا كل أسئلة الشهر الجاي على أكتر من مصدر: ويكيبيديا بالعربي والإنجليزي، ويكي داتا، ترانسفيرماركت، كووورة، بطولات وفي الجول.
- من لغز #٢٩ (الخميس): «الشبكة» فيها ١٣ نادي أوروبي زيادة: أتلتيكو مدريد، روما، موناكو، دورتموند، أياكس، توتنهام، إشبيلية، مارسيليا، فالنسيا، إيفرتون، وست هام، نابولي، وليفركوزن.
٢٣ أكتوبر ٢٠٢٦
- من لغز #٢٤: أهداف وماتشات الدوري مع الأهلي والزمالك في «أعلى ولا أقل» و«رتّب الستة» بقت كلها من ترانسفيرماركت، ماتش بماتش (زي إمام عاشور: ١٩ هدف في الدوري مع الأهلي). وكمان ماتشات وأهداف منتخب مصر في «رتّب الستة». اللاعبين اللي أرقامهم مش كاملة هناك اتشالوا عشان مفيش رقم غلط. شكرًا لـGameel!
- «الشبكة» و«الخلية» و«مين يجمعهم؟»: «لعب في بلجيكا» بقت «لعب في دوري بلجيكا» وعليها 🏟️ بدل العلم، عشان يبقى واضح إن المقصود لعب لنادي هناك، مش إنه من البلد دي. العلم بقى للمنتخب بس. شكرًا للي سألوا عن أوريغي!
- من لغز #٢٥: «ماتقولش زيي» بقت أقرب لفكرتها: كل سؤال فيه لاعيبة معروفة كتير تقدر تقولها، وأنا بفكر في واحد من أشهرهم، مش لاعب محدش يفتكره. التحدي بقى إنك ماتقولش زيي، مش إنك تفتكر أي حد.
٢٢ أكتوبر ٢٠٢٦
- «توب ١٠»: خانة الكتابة بقت تعرف أكتر من ٢٠٠٠ لاعب عالمي زيادة، فلاعيبة زي أسينسيو ويامال وكوستا بقوا بيطلعوا (لو مش في القايمة هيتقالك إنه غلط بدل ما ميطلعوش خالص). و«كوارشي» بقى يتقبل بالعربي في «الشبكة».
- «خمّن الشعار» و«مسيرة لاعب»: الإجابة الصح مبقتش تظهر في القايمة الحمرا مع الإجابات الغلط.
- من لغز #٢٣ (بكرة): العلم في «مين يجمعهم؟» بقى بيتحسب بالجنسية حتى لو اللاعب ملعبش للمنتخب (زي عمر الساعي)، ومسيرة محمود صابر بقت فيها إعارته لسموحة، وبطولات سيد معوض وهادي خشبة ومحمد حمص الناقصة اتضافت من ترانسفيرماركت. شكرًا لكل اللي بلّغوا!
٢١ أكتوبر ٢٠٢٦
- جديد: «مقالات» (تحت الألعاب في الصفحة الرئيسية) عن الكورة اللي بنحبها: مصر في أمم أفريقيا وكاس العالم (ومنها ليلة الأرجنتين ٢٠٢٦)، المصريين في إنجلترا، الدوري السعودي من ٢٠٢٣، أنظمة اللعب، الإعارات، وليه الأرقام بتختلف بين المواقع. ونصايح للألعاب. كل معلومة ليها مصدر.
- من لغز #٢٢ (بكرة): «لعب مع…» بقت بتحسب زمايل المنتخب كمان، مش النادي بس (زي حجازي مع صلاح في منتخب مصر).
٢٠ أكتوبر ٢٠٢٦
- «توب ١٠» النهارده: قايمة «أغلى ١٠ صفقات» للدوري الإنجليزي كان فيها كوتينيو وهازارد، ودول اتباعوا من أندية إنجليزية مش اشترتهم. اتصلّحت دلوقتي: السؤال بقى «أغلى ١٠ صفقات اشترتها أندية الدوري الإنجليزي» (جايين من برّه أو من نادي تاني في نفس الدوري)، ودخل مكانهم كايسيدو ولوكاكو. ونفس التصليح في قايمتي الدوري السعودي والمصري. وكل صفقة في أسئلة الانتقالات بقت متراجعة على سجل انتقالات اللاعب في ترانسفيرماركت. شكرًا لكل اللي بلّغوا!
- من لغز #٢١ (بكرة): «الشبكة» و«الخلية» و«ماتقولش زيي»: المصريين اللي ملعبوش للمنتخب بقوا بيتحسبوا «مصري احترف برا» (زي أحمد ياسر: ليرس البلجيكي والميناء العراقي).
- من لغز #٢١ (بكرة): «لعب مع…» و«دربه…» مبقتش بتحسب الفترة اللي اللاعب كان فيها معار لنادي تاني (زي درينثي: كان معار لهيركليس وإيفرتون لما مورينيو مسك ريال مدريد، فمش هيتحسب «دربه مورينيو»).
١٩ أكتوبر ٢٠٢٦
- من لغز #٢٠ (بكرة):
- «توب ١٠»: كل قايمة ١٠ أسامي بالظبط (من غير تعادلات توصلها لـ١٥)، ومفيش قايمة فيها نفس اللاعيبة اللي لعبناهم من قريب.
- «العِشرة»: لاعيبة معروفين أكتر، وفي كل قايمة ٣ أسامي صعبة بالكتير.
- «الشبكة»: الأجانب اللي ملعبوش لمنتخب بلدهم بقوا بيتحسبوا «أجنبي لعب في مصر» (كومازيتش، خوان ألفينا، دغموم، أموتو…)، و«دربه مورينيو» بقت تشمل ريال مدريد الموسم ده (يان ديوماندي، مبابي). شكرًا للي بلّغوا!
١٨ أكتوبر ٢٠٢٦
- من لغز #١٩ (بكرة)، بعد ما لعبنا لغز النهارده:
- «مسيرة لاعب»: أول مسيرة كل يوم لنجم الكل يعرفه، وأكتر من ٣٥٠ مسيرة جديدة لنجوم العالم (ميسي، مبابي، زيدان، دروجبا، مودريتش، هالاند…). وكل يوم خليط: مصريين وعرب وأفارقة ونجوم من برا.
- «الشبكة» السهلة بقت سهلة بجد: أندية كبيرة ولاعيبة معروفين في كل خانة.
- «توب ١٠» و«رتّب الستة»: قوايم لاعيبة معروفين، ومن غير قوايم مدربين.
- «سمّي الـ١١»: يا مصر والأهلي والزمالك في أهم مبارياتهم (أمم أفريقيا، كأس العالم، نهائيات أفريقيا)، يا فرق العالم الكبيرة (نهائيات دوري الأبطال، كأس إنجلترا، اليورو، كوبا أمريكا). أكتر من ١٠٠ تشكيلة جديدة، ومفيش تشكيلة بتتكرر قبل شهور.
- «الخلية»: خانات سعودية أقل بكتير.
- «مين يجمعهم؟»: سؤال الدوري السعودي بقى كل ٤ أو ٥ أيام، ونجوم عالميين لعبوا هناك (نيمار، بنزيما، كانتي…).
١٧ أكتوبر ٢٠٢٦
- من لغز #١٨ (بكرة) كل الألعاب فيها تنويع أكتر، من اقتراحاتكم ومن نتايجكم:
- لعبتين جداد: «مين يجمعهم؟» في Plus (ناديين وجنسية و١٥ ثانية تسمّي لاعب يجمع التلاتة، ٥ أسئلة كل يوم من السهل للصعب جدًا، وكل سؤال ليه أكتر من إجابة) و«تشكيلة مين؟» مفتوحة للكل (١١ علم في الملعب، اعرف الفريق).
- «الشبكة» و«مين يجمعهم؟»: خانات جديدة زي «لعب مع ميسي» و«دربه جوارديولا» و«كسب دوري أبطال أوروبا»، ونص أيام الشبكة حوالين أندية أوروبا الكبيرة.
- «مسيرة لاعب» و«خمّن الشعار» و«ماتقولش زيي» و«مين يجمعهم؟» و«تشكيلة مين؟»: فوق كل سؤال مكتوب مستواه: سهل، متوسط، صعب، صعب جدًا.
- «العِشرة»: لاعيبة جداد كتير (أبوتريكة، الشناوي، بركات، بنزيما، بونو، كانتي…)، مزيج من مصر والعرب وأوروبا، ولاعيبة معروفين بس.
- «مسيرة لاعب»: أكتر من ٦٠ مسيرة جديدة (تريزيجيه، مصطفى محمد، عمرو زكي، حمد الله، أوباميانج…)، ومحدش هيتكرر قبل شهر.
- «الشبكة»: زي futbol11: الأندية ممكن تبقى فوق وجنب (الأهلي × الزمالك، تشيلسي × أرسنال)، ومعاها منتخبات وبطولات ومراكز. وأيام فيها أندية أوروبا الكبيرة. ومفيش صف بيتكرر من امبارح.
- «أعلى ولا أقل»: سنة الميلاد بقت مرة في الأسبوع بس وبلاعيبة مشهورين، وجت أهداف وماتشات اللاعب في مسيرته كلها: نص مصريين وعرب ونص نجوم من برا.
- «البنكير»: لاعيبة تعرفهم، أغلبهم مصريين وعرب.
- «توب ١٠»: ٢٢ قايمة جديدة: آخر ١٠ أبطال للدوري المصري وكأس مصر والدوري السعودي والكونفدرالية وأبطال آسيا والبطولة العربية، وآخر ١٠ مدربين لبيراميدز والنصر والاتحاد والرجاء والترجي ومنتخبات مصر والسعودية والمغرب والجزائر وتونس، وهدافين الدوري المصري والسعودي.
١٦ أكتوبر ٢٠٢٦
- تقدر تشترك في Plus بإنستاباي من مصر: حوّل من صفحة Plus واكتب اسم حسابك في الملاحظة، وبنفتحهولك أول ما نتأكد من التحويل.
- من بلاغاتكم: «ناتشو فرنانديز» بالاسم الكامل بقى مقبول، وشعار السيلية القطري مش هيظهر تاني في «خمّن الشعار» من بكرة.
١٣ أكتوبر ٢٠٢٦
- «سمّي الـ١١»: من لغز #١٤ التلات والخميس والسبت فيهم ماتش عالمي: نهائيات دوري أبطال أوروبا من ٢٠٠٦ ونص نهائي ونهائي كأس العالم. باقي الأيام لسه ماتشات مصر والعرب وأفريقيا.
- «الخلية» بقت بتتغير أكتر من يوم للتاني: الخانات اللي كانت بتيجي كل يوم (لعب في السعودية، الاتحاد، النصر…) بتريّح أيام، والحل اللي بيظهر في الآخر بقى فيه لاعيبة مختلفة.
- «العِشرة»: علم بلد كل لاعب ظاهر في الخانة، في السهل والصعب.
- الموقع بقى أخف: بيحمّل الصفحات لما تدوس عليها بس.
١١ أكتوبر ٢٠٢٦
- مسيرة أفشة في «مسيرة لاعب» اتصلحت: بدأ في الرجاء (إعارة من شباب إنبي) قبل إنبي، حسب ترانسفير ماركت. شكرًا للي بلّغ.
- من لغز #١٢ «الشبكة» بتقبل ٦٩ لاعب كانوا ناقصين بطولات: الدوري المصري وكأس مصر والبطولة العربية (زي أفشة وحسام عاشور وطاهر أبو زيد).
- مشتركين Plus: الجولة الإضافية بتاعة الألعاب المجانية بقت ظاهرة على كارت اللعبة في الصفحة الرئيسية بعد ما تخلّص لغز النهارده.
٧ أكتوبر ٢٠٢٦
- «سمّي الـ١١» بقت ٩١ ماتش من ٢٠٠٦ لحد النهارده بدل ٣٢ نهائي: ماتشات مصر في كأس العالم وكأس القارات، فاصلة أم درمان، أدوار خروج المغلوب في أمم أفريقيا، الأهلي في كأس العالم للأندية، السعودية والأرجنتين، المغرب في مونديال ٢٠٢٢، وغيرهم. كل ماتش بييجي مرة قبل ما أي ماتش يتكرر.
- تصليح في «أعلى ولا أقل»: أهداف لاعيبة مع الزمالك والأهلي كانت بتتحسب كأنها أهداف دولية (شيكابالا ظهر بـ٧٠ هدف مع مصر). شكرًا لكل اللي بعتوا.
- إنبي بقت باسمها الجديد «الشرقية إنبي» بعد الاندماج، والاسم القديم لسه مقبول.
- شعار الرجاء في «خمّن الشعار» بقت الكتابة عليه مغبّشة وإنت بتخمّن.
٦ أكتوبر ٢٠٢٦
- «خمّن الشعار» بقت من أندية معروفة لجمهورنا بس: أندية مصر الكبيرة، أندية السعودية المعروفة، الأندية العربية والأفريقية الكبيرة، والأندية الأوروبية الكبيرة (بعد بلاغات عن شعارات زي بالم سيتي وأيل ليماسول).
- لاعيبة بنفس الاسم (زي حسام حسن الكبير وحسام حسن مواليد ١٩٨٩): الإجابة بتتقبل لو أي واحد فيهم بيجمع الخانة، في «الشبكة» و«الخلية» و«ماتقولش زيي».
- زرار «ابعتها واتساب» بعد كل لعبة عشان تبعت نتيجتك لصحابك.
٣ أكتوبر ٢٠٢٦
- جواو فيليكس بقى بيتحسب مهاجم في «الشبكة» (حسب ترانسفير ماركت) بعد بلاغ من لاعب.
- «خمّن الشعار» بتبدأ بصورة أبعد شوية، بعد ما ناس شافت لون بس في شعارات وسطها فاضي.
- «مسيرة لاعب» و«خمّن الشعار» مش بيكرروا نفس اللاعب أو الشعار في أسبوعين، و«العِشرة» مش بتكرر اللاعب في شهر.
- «توب ١٠»: في قوايم البلاد العلم بيستنى لحد ما تلاقي البلد عشان مايكشفش الإجابة.
- المستوى المتوسط في «الشبكة» بقى أسهل: كل خانة فيها ٦ إجابات على الأقل، منهم ٤ معروفين.
٢ أكتوبر ٢٠٢٦
- ألقاب أكتر بتتقبل: «أفشة»، و«الزعيم» و«العالمي» و«العميد» وغيرهم للأندية.
- الأسامي والألقاب بالفرانكو بتتفهم في كل الألعاب.
١ أكتوبر ٢٠٢٦
- اللغز رقم ١: الإطلاق الرسمي لكورة ديلي.
- أسئلة أسهل في كل الألعاب بعد التجربة الأولى: لاعيبة وأندية وماتشات أشهر.
- «العِشرة» بشكلها الجديد: سمّي أكتر ١٠ لعبوا مع لاعب اليوم (من ترانسفير ماركت).
- «البنكير»: أرقام المسيرة كاملة (الأندية والمنتخب، الماتشات الرسمية بس).
- مفيش موضوع واحد بيتكرر في نفس اليوم بين «توب ١٠» و«أعلى ولا أقل» و«رتّب الستة» و«البنكير».
٣٠ سبتمبر ٢٠٢٦
- محتوى أكتر من برا مصر: قوايم وألغاز عن السعودية والعرب وأفريقيا، وقوايم جديدة في «توب ١٠» (أبطال أفريقيا، آخر مدربين الأهلي، أبطال أمم أفريقيا…).
- «الشبكة»: كل خانة فيها جانب مصري أو سعودي، عشان كل إجابة صح تبقى عندنا.
- «مسيرة لاعب»: ٥ لاعيبة كل يوم من الأسهل للأصعب، و٦٢ مسيرة جديدة لنجوم الدوري السعودي.
٢٩ سبتمبر ٢٠٢٦
- مراجعة ٢٥ مسيرة لاعيبة كانت مختلفة بين ويكيبيديا وترانسفير ماركت، والاعتماد على ترانسفير ماركت.
- ماتشات وأهداف منتخب مصر: الخلافات بين RSSSF وويكيبيديا اتحسمت بترانسفير ماركت.